Maria Lauber - geb. 25. Aug. 1891 - gest. 4. Juli 1973
Ihr Geburtsort
Praschte bi Frutige
A Praschten omna bin ig gebore. Praschte lit - oder hanget - ungfahr e Stund hinder un o'ddem Dorf Frutige.
Wär net guet Bschiid wiis, ischt imstand u zelt Praschte nug zun de Spisse, wa sig witerinhi in ere Reieta va Pürte uf höeje sunige Terasse bis gäge ds Adelbode zieh.
Ihre Werke
Es Gürmschbüümi bin ig ga riihen in öesa Wald a Praschte, ha's pflanzet in Garte vur em Schuelhus z'Chie, das ig öppis bi mer hiigi van dahiime. Es blüeit da nu jitz u siner röte Chräliböreni gfröuwe mig alimal, wen ig im Herbscht drand verbigah.
Di miischte va minen Büechlenen sin da gschribe worde; d'Gedicht han ig funden am Mülirii, an der Chander un obenus in de Wiideni.
Die Lehrerin
Schuel ghabe han ig zweiuvierzg Jahr.
Vierzächni dervan an re Gsamtschuel, als Stellverträteri im Adelbode un an der Lengg; achtuzwenzg Jahr z'Chie, da, wan d'Chiene us em Chiental usa chunt z'schiessen u net mag gwarte, bis dass si cha zur Chander springen u mit era zusu, gäg em blauwe See.